Theresa May kuwa waziri mkuu wa Uingereza

Image copyrightGETTY IMAGES

Image captionTheresa May kutangazwa waziri mkuu wa Uingereza

Katika saa au siku kadhaa zijazo, Waziri wa maswala ya ndani wa Uingereza, Theresa May, atatangazwa kinara mpya wa chama cha Conservative, na waziri mkuu mpya wa Uingereza.

Hii ni baada ya mpinzani wake mkuu katika kinyanganyiro ya kuwania kiti cha uaziri mkuu mbunge Andrea Leadsom, kujiondoa.

Uingereza kupata waziri mkuu mwanamke

Andrea Leadsom ameamua kumuunga mkono mpinzani wake, Theresa May kuwania kiti hicho, huku akisema kuwa anatakiwa kutimiza uungwaji wake mkono wa kujiondoa kwa Uingereza kutoka muungano wa jumuia ya mataifa ya EU na kutoa fursa kupatikana kwa haraka kwa waziri mkuu mpya.

Image copyrightAP

Image captionMay atachukua pahala pake David Cameron aliyejiuzulu baada ya kushindwa katika kura ya maoni

Wakuu wa chama cha Conservative kwa sasa wanajadiliana ili kumuidhinisha Bi May, kuchukua nafasi hiyo na kuwa waziri mkuu wa pili wa kike nchini Uingereza baada ya Bi Margaret Thatcher.

Wakati huo huo, Mbunge Angela Eagle ametangaza rasmi nia ya kumn'goa Jeremy Corbyn kama kinara mkuu wa chama cha Leba.

Eder: Mchezaji aliyeliza Wafaransa

Image copyrightEPA

Image captionEder asili yake ni Guinea-Bissau

Kabla ya fainali ya michuano ya Euro 2016 kati ya Ufaransa na Ureno kuanza, wengi walikuwa wakimzungumzia mshambuliaji wa Real Madrid Cristiano Ronaldo.

Lakini hali ilibadilika baada ya Ronaldo kuumia na kulazimika kuondoka uwanjani, huku akitokwa na machozi.

Kwa wengi, kitumbua cha Ureno kilikuwa kimeingia mchanga. Lakini, baadaye kulijitokeza shujaa mwingine.

Image copyrightREUTERS

Image captionEder nusura aumie muda mfupi baada ya kuingia uwanjani

Mashabiki wengi wa soka duniani, walimfahamu mshambuliaji mtata, Eder, aliyefunga bao la ushindi dakika ya 109 na kuzamisha ndoto ya Wafaransa uwanja wa Stade de France, Paris.

• Ureno mabingwa wa Ulaya 2016

Eder aliingia nafasi ya kiungo wa kati Renato Sanches.

Haya hapa ni mambo muhimu kumhusu Eder.

1. Jina lake kamili ni Éderzito António Macedo Lopes, Macedo likiwa jina la ukoo wa mamake na Lopes jina la ukoo wa babake.
2. Eder alizaliwa nchini Guinea-Bissau, taifa lililotawaliwa na Wareno hadi lilipojinyakulia uhuru 1974.
3. Ana umri wa miaka 28 na anasema Ronaldo alimwambia angefunga bao. “Alinipa moyo na nguvu, na hilo lilikuwa muhimu.”
4. Kimo cha Eder ni futi 6 na inchi 3.
5. Alihamia Ureno akiwa mtoto soka yake ya kulipwa alianza kucheza mara ya kwanza klabu ya Academica 2008 kabla ya kujiunga na klabu ya Braga miaka minne baadaye ambapo aliwika sana.
6. Alichezea klabu ya Swansea mwaka 2015 baada ya kununuliwa £5 milioni kutoka Braga. Mechi yake ya kwanza Ligi ya Premia ilikuwa sare ya 2-2 dhidi ya mabingwa watetezi wa wakati huo Chelsea alipoingia nafasi ya Bafetimbi Gomis. Hakufunga bao lolote Swansea na akatumwa klabu ya Lille ya Ufaransa inayocheza Ligue 1 kwa mkopo kipindi kilichosalia cha msimu.

   Image copyrightREUTERS

   Image captionRonaldo akimpongeza Eder

7. Eder alijiunga rasmi na Lille kwa mkataba wa kudumu Mei mwaka huu baada ya kuwasaidia kufuzu kwa Europa League.
8. Katika uchezaji wake Ligi Kuu ya Ureno, alicheza jumla ya mechi 143 na kufunga mabao 38.
9. Eder amechezea timu ya taifa ya Ureno tangu 2012 na aliwachezea Kombe la Dunia 2014.
10. Alifungia Ureno bao lake la kwanza la kimataifa mechi yake ya 18, mechi ya kirafiki dhidi ya Italia katika uwanja wa Stade de Geneve Juni 2015.

Mwanamke apinga udhalimu wa polisi Marekani

Image copyrightJONATHAN BACHMANREUTERS

Image captionMwanamke apinga udhalimu wa polisi Marekani

Maandamano nchini Marekani kupinga mauaji ya wanaume weusi na polisi wazungu yameendelea katika mji wa Baton Rouge, Louisiana.

Image copyrightAFP

Image captionMakumi ya waandamanaji walikamatwa na polisi

Makumi ya waandamanaji walikamatwa huku polisi wakiendeleza sera yao ya kuwakamata kamata weusi wanaopinga mauaji hayo ya polisi.

Image copyrightAP

Image captionViongozi wa vuguvugu la Black Lives matter walikamatwa

Matukio ya makabiliano hayo yameibua hofu ya kuenea kwa uhasama na ubaguzi wa rangi.

Hata hivyo picha moja imeibua hisia kali kwenye mitandao ya kijamii kote duniani.

Image copyrightREUTERS

Image captionPolisi wameendeleza kauli ya kuwa na msimamo mkali dhidi ya weusi

Picha hiyo inaonesha maafisa wawili wa polisi waliojihami hadi kwenye kisigino wakijiandaa kumkabili kipusa mmoja mweusi ambaye hakuwa amejihami kwa namna yeyote ila kwa ujasiri wa kupinga mauaji hayo ya wanaume weusi jumanne iliyopita.

Image captionPicha hiyo ya mwanamke huyo imefananishwa na ile ya ''Tank Man'' ya China

Picha hiyo ilipigwa na mpiga picha wa shirika la habari la Reuters Jonathan Bachman, ambaye ni mkaazi wa mji wa New Orleans.

Image copyrightREUTERS

Image captionmakumi ya waandamanaji walikamatwa

Waamerika wengi waliosambaza picha hiyo wameifananisha na ile picha ya mwanaume aliyekuwa akipigania haki za wenyeji nchini China wakati walipokabiliwa na wanajeshi wakiwa wamejihami na vifaru vya kijeshi.

Wapiganiaji haki za kibinadamu na haswa haki za wamarekani weusi wamekuwa wakijadili sadfa ya kuwa taifa linalodai kuwa kitovu cha demokrasia kinatumia mbinu za kidhalimu zilizotumika mataifa ya kikomunisti karne iliyopita.

Image copyrightREUTERS

Image captionwanaume weusi wamejipata pabaya mikononi mwa polisi wazungu

Mpiganiaji haki za weusi Shaun King ambaye pia ni mwandishi wa jarida la New York Daily anasema kuwa ni jambo la kufedhehesha mno mno kuwa picha hiyo ya kihistoria inatokea Marekani mwaka huu wa 2016, weusi wakipigana dhidi ya ubaguzi wa rangi.

Image copyrightAFP

Image captionAlton Sterling ambaye mauaji yake yaliibua maandamano Marekani

Kipusa huyo anadaiwa kukamatwa na polisi lakini hakuna anayemfahamu wala anayejua kilichomkuta mikononi mwa polisi.

Mamia kupigwa picha za utupu Uingereza

Image copyrightAFP

Image captionTunick anasema hiyo ni sanaa halisi

Mamia ya watu watavua nguo zao na kupigwa picha wakiwa tupu kusherehekea utamaduni katika mji wa Hull, Uingereza.

Tukio hilo litakuwa la kusherehekea mji huo kama Mji wa Utamaduni.

Washiriki watapakwa rangi ya samawati Jumamosi na kisha wapigwe picha wakiwa katika maeneo mashuhuri jijini humo kama sehemu ya mradi uliopewa jina Sea of Hull.

Mradi huo unatekelezwa na mpiga picha Spencer Tunick na unadhaminiwa na taasisi ya Sanaa ya Ferens Art Gallery.

Picha zitakazopigwa zitawekwa na kuoneshwa kwa umma wakati wa tamasha ya sanaa ya 2017 itakayoendelea kwa mwaka mmoja.

Tunick, anayetoka New York, amewahi kufanya kazi kama hiyo kwingine.

Amewahi kupiga picha za watu wengi wakiwa uchi Sydney Opera House, Place des Arts mjini Montreal, Mexico City na mjini Munich nchini Ujerumani Germany.

Bw Tunick amesema kazi zake “hugusia historia ndefu ya Sanaa ya utupu”.

"Mavazi ni Sanaa ya mtu mwingine,” anasema.

“Fashoni ni Sanaa. Kwa kuondoa hilo (mavazi), nitakuwa nafanya kazi na usawa na maumbile katika umaridadi wake.”

Image copyrightAP

Image captionWatu wakipigwa picha wakiwa uchi New York

Watu karibu 2,000 wamejiandikisha kupigwa picha tangu wazo hilo litangazwe mwezi Machi.

Baraza la mji wa Hull limesema baadhi ya barabara zitafungwa wakati wa shughuli hiyo Jumamosi asubuhi.

Samsung yafeli mtihani wa kuwa ndani ya maji

by rorya maendeleo

Image copyrightGETTY

Image captionSamsung yafeli mtihani wa kuwa ndani ya maji

Simu ya kisasa ya Samsung Galaxy S7 inayopigiwa upatu kuwa na uwezo wa kustahimili kuwa chini ya maji imefeli majaribio ya shirika la moja la kutathmini ubora wa bidhaa za kielektroniki.

Programu ya simu hiyo ya Samsung Active ilizima punde baada ya kutumbukizwa ndani ya pipa la maji.

Kampuni hiyo ya kutathmini ubora wa bidhaa, Consumer Reports ilirejelea jaribio hilo kwa mara ya pili wakitumia simu tofauti na kama ile ya kwanza ikafeli.

Kampuni ya kutengeza simu hiyo ya Samsung ikijitetea imesema huenda simu hizo zilikuwa ni mbovu na hivyo kuruhusu maji kuingia ndani.

Image copyrightAP

Image captionSimu hizo za Samsung zilizima baada ya kutumbukizwa ndani ya maji

Simu hizo zilitumbukizwa ndani ya mapipa ya maji na kutolewa baada ya dakika.

Simu hizo za Samsung zilizima.

Kulikuwa hata na maji katika eneo la kamera za simu hizo mbali na viputo.

Image captionKampuni inayotengeza simu hizo kutoka Korea Kusini Samsung imejitetea vikali ikisema kuwa Galaxy S7 Active, inayouzwa Marekani imefanyiwa majaribio kabambe na hata kupewa cheti maalum cha IP68.

Kampuni inayotengeza simu hizo kutoka Korea Kusini Samsung imejitetea vikali ikisema kuwa Galaxy S7 Active, inayouzwa Marekani imefanyiwa majaribio kabambe na hata kupewa cheti maalum cha IP68.

Hati hiyo maalum inathibitisha kuwa simu hizo zinauwezo wa kustahimili kutumbukizwa ndani ya maji.

Consumer Reports iligonga vichwa vya habari kote duniani ilipotambua kuwa simu aina ya Iphone 4 ilikuwa na matatizo ya ya kifaa cha kuungia mbali.

''kwa kawaida tumekuwa tukiamini pale mtengezaji wa bidhaa akituambia kuwa bidhaa yake inaweza kustahimili hata kutumbukizwa ndani ya maji, lakini leo tulipojaribu kuhakiki madai ya Samsung tuligundua kuwa simu hizo zinazima baada ya kutumbukizwa ndani ya pipa la maji ''

''Bila shaka wale walionunua simu hizo kwa imani kuwa haitoharibika hata baada ya kutumbukizwa ndani ya maji, watalazimika kutafuta ridhaa kutoka kwa watengenezaji,,,''

Image captionConsumer Reports iligonga vichwa vya habari kote duniani ilipotambua kuwa simu aina ya Iphone 4 ilikuwa na matatizo ya ya kifaa cha kuungia mbali.

Simu hiyo ilianza kuuzwa mwezi juni mwaka huu.

Mwaka uliopita Sony, iliwaonya watumiaji wa bidhaa zake kuwa kulikuwa na uwezekano kuwa simu zake zitaharibika zikitumika ndani ya maji.

Samsung inatarajiwa kutangaza faida kubwa zaidi baada ya mauzo yaliyozidi matarajio ya simu hiyo aina ya Galaxy S7.

Mabaki ya Wafilisti yapatikana Israel

Image copyrightAFP

Image captionWatafiti wanasema hilo ni kaburi la kwanza kabisa la Wafilisti kupatikana

Watafiti wa mambo ya kale nchini Israel wamegundua makaburi ya kwanza ya Wafilisti.

Makaburi hayo, yaliyopatikana eneo la Ashkelon, yaligunduliwa mwaka 2013, lakini habari hizo zilifichuliwa Jumapili.

Habari hizi ziliwekwa siri muda huo wote kuzuia kushambuliwa na waandamanaji wa makundi ya Wayahudi wahafidhina ambao hawakutaka makaburi hayo yafukuliwe.

Image copyrightAFP

Image captionMradi wa Leon Levy ulianzishwa miaka 30 iliyopita

Taarifa zinasema ugunduzi huo huenda ukafichua mengi kuhusu asili ya Wafilisti ambao wamezungumziwa sana katika vitabu vya kidini.

Mafanikio hayo yalitokea mwisho wa mwaka wa 30 wa uchimbaji ulioongozwa na kundi la Leon Levy Expedition.

Viongozi wa uchimbaji huo wanasema walipata makaburi yaliyozingirwa na manukato, vyakula, mapambo, vito na silaha.

Yanadaiwa kujengwa na kutumiwa kati ya karne ya 11 na karne ya 8 kabla ya kuzaliwa kwa Yesu.

Image copyrightAFP

"Baada ya kutafiti kuhusu Wafilisti kwa miongo mingi, hatimaye tunaweza kuwatazama,” anasema mmoja wa wanaakioloiia hao Daniel M Master.

“Kwa ugunduzi huu, tunakaribia kubaini siri za asili yao.”

Wanaakiolojia hao sasa wanafanya uchunguzi wa DNA pamoja na uchunguzi wa miale ya ukaa kubaini watu hao waliishi wakati gani.

Image copyrightREUTERS

Image captionProfesa Lawrence E. Stager ni mmoja wa wanaoongoza utafiti huo

Watafiti hutofautiana kuhusu asili ya Wafilisti, baadhi wakiamini walitoka Ugiriki, wengine visiwa vya Crete au Cyprus na wengine eneo la Anatolia nchini Uturuki.

Wafilisti huoneshwa katika Biblia kama maadui wakuu wa Waisraeli, na inadhaniwa walihamia Israel kutoka maeneo ya Magharibi karne ya 12 kabla ya kuzaliwa kwa Yesu.

Image copyrightAFP

Anayefahamika zaidi ni Goliath, mpiganaji ‘jitu’ ambaye kwa mujibu wa Biblia, aliuawa na Daudi kabla yake kuwa Mfalme wa Waisraeli.

Katika Biblia, wanaoneshwa kama watu wakatili lakini mabaki yaliyopatikana yanaonekana kuashiria kwamba walikuwa na ustaarabu fulani.